Senior citizens mibali

CEBU, Philippines - Human sa siyam ka mga lider sa Bando Osmeña Pundok Kauswagan, mga senior citizens nga girepresentahan sa 23 nila ka mga dagkong lider sa south district mibakwi kagahapon sa ilang suporta kang Mayor Tomas Osmeña sa rason nga dili kaya sa panglawas niini ang pagrepresentar sa distrito ngadto sa Kongreso.

Ang mga lider sa senior citizens gipresentar kagahapon sa kaatbang ni Osmeña nga si Jonathan Guardo. Naghiusa sila sa pag-ingon nga wala sila makauyon pagdumala sa pangagamhanan sa siyudad bisan pa sa gipanghatag nga tag-P4 mil matag tuig.

Ang maong mga lider naggikan sa 23 ka mga urban poor barangay nga gilangkuban sa barangay Pasil, Suba, San Nicolas-Proper, Pahina-San Nicolas, Duljo-Fatima, Quiot-Pardo, Punta Princesa, Calamba, Poblacion-Pardo, Kinasang-an, Basak San Nicolas, Inayawan, Cogon, Guadalupe, Tisa, Basak-Pardo, Bulacao, Labangon, Sawang Calero, Mambaling, Kalunasan ug Sapangdako.

Si Rosalinda Hayag sa barangay Sapangdaku nagkanayon nga dako kaayo siyang Osmeñanista sukad pa kaniadto, apan alang kaniya dili paigo ang gipanghatag nga tag-4 mil matag tuig kanilang mga tigulang sa siyudad.

Samtang si Naty Arandes sa Basak-Pardo miingon nga nahiubos kaayo siya kay loyal kaayo siya kang Osmeña ug usa siya sa nangampanya sa mayor sa kabukiran apan wala gyud kini nakatabang kaniya sa dihang na-operahan.

Ang inahan sa peryodistang si Homer Sayson nga si kanhi Guadalupe barangay councilor Erlinda Sayson miingon nga kuyog siya sa pagpangampanya ni Margot Osmeña apan gisalikway siya sa grupo niini hinungdan nga mibalhin kini kang Guardo.

Apan matud nila nga dili sila motuo nga makapadayon si Osmeña pagserbisyo sa south district tungod sa operasyon niini sa kanser sa pantog ug sa padayon niining medikasyon.

Si Guardo sa iyang bahin miingon nga sa higayon nga mapili siyang kongresista, tag-P1,000 kada senior citizen kada bulan ang iyang ihatag, motukod usab siya og laboratory center aron libre ang mga laboratory examination ug iya usab nga ayuhon ang Cebu City Medical Centers aron daghan ang mga makapahimulos niini.

Gitumbok ni Guardo nga wala sila matandog sa giingong 100 ka supporters sa Pasil nga mibali kang Osmeña tungod kay daan na kining mga tawo sa mayor.

Si Osmeña sa iyang bahin sa dihang nahinabi sa ABS-CBN mikatawa lang ug miingon nga ang maong mga senior citizens daan nang mga sakop sa Kugi Uswag Sugbo. – BANAT NEWS