CEBU, Philippines - Gidugok sa liboan ka mga Sugboanon ang caravan sa Liberal party nga gipangunahan gyud sa igsuon ni presidential bet Noynoy Aquino nga si Kris Aquino ug mga artista.
Sa pagkagabii, gihimo ang Rock the Vote concert sa Fuente Osmeña rotunda sa mga iladong banda sa kauluhan.
Uban ni Kris Aquino silang Boy Abunda, mga singer nga si Jed Madela ug Erik Santos. Gikan sa Mactan Cebu International Airport sa buntag, milahos sila sa amihanang bahin sa lalawigan.
Gibisita ni Kris Aquino ang lungsod sa Madridejos sa isla sa Bantayan, Danao, Bogo ug dakbayan sa Lapulapu.
Sa mga proclamation rally, ilabi na sa public plaza sa Bogo, mipadayag og pasalamat si Kris sa mainitong pagdawat sa mga tawo ilabi na sa iyang igsuong kandidato pagka-presidente.
Uban ni Kris Aquino ang mga kandidato sa Liberal party sa lalawigan nga si gubernatorial candidate Hilario Davide III ug Bise Gobernador Gregorio Sanchez Jr.
Pagka-alas 6 sa gabii, liboan ka mga batan-on ang mitambong sa “Rock the Vote: Roadtrip to Change” nga gilusad sa nangulo niining si Sen. Francisco “Kiko” Pangilinan ug mga apo ni anhing Pres. Cory Aquino.
Ang mga sikat nga banda nga milingaw sa batan-ong nanambong sa kalihukan mao ang Parokya ni Edgar, Kamikazee, Hale ug Moonstar88, ug apil usab si Christian Bautista.
Usa ka concert caravan ang RTV nga gituyo aron gawasnong makapadayag ang mga batan-on nga may hilig o interesado sa visual art, music, filmmaking, photography, mountaineering, skateboarding ug uban pa.
Tuyo sa caravan nga mamahimong luna sa mga tawong nagtuo ug gusto og kausaban nga pinaagi sa umaabot piniliay, mamahimo kining usa ka kalihukan diin ang mga tawo makapadayag sa ilang ‘creativity’ aron mabalik ang gahum sa kinabag-ang katawhan. Ang RTV maoy molangkob sa katapusang hunat sa pagpangampanya sa Liberal Party pinaagi sa mga kabatan-onan.
Gihimo kini aron suportahan ang tinguha sa gitawag og “yellow team” nga nagkampanya alang kang Noynoy Aquino ug Mar Roxas sa pagka-presidente ug pagka-bise presidente sa nasud sa Lunes nga presidential election. (BANATNEWS)