Mipatay sa asawa, kabit nadakpan

CEBU, Philippines - Human sa 12 ka tuig nga pagtago-tago gikan sa awtoridad, nadakpan na ang lalaking suspek sa pagpatay sa iyang asawa ug kabit sa naulahi nga giingong iyang nasakpang naghilawas diha sulod sa ilang panimalay sa dakbayan sa Mandaue niadtong 1998.

Ang suspek nga si Andito Cadusale, 44, molupyo sa barangay Molo-Molo, Villahermoso Negros Oriental ang nasikop sa mga sakop sa Criminal Investigation and Detection Group-7 didto sa Bulacan sa Luzon niadtong Domingo sa buntag.

Ang suspek nga gikunsiderar sa dakbayan sa Mandaue nga most wanted ug may patong sa ulo nga P90,000 sa Department of Interior and Local Government -7 alang sa pagkadakop gitumbok nga mipatay sa asawang si Haydee ug sa gipasangil nga kabit niini nga si Yolito Canunayon.

Armado sa warrant of arrest gikan ni Regional Trial Court (RTC) Branch 8 Judge Mercedes Gozo Dadole sa syudad sa Mandaue nadakpan sa grupo ni SPO3 Teofilo Juanata ang suspek diha sa barangay Tibagan sa lungsod sa Bustos sa Bulacan atol sa pista niadtong Domingo.

Nasayran nga ang grupo sa CIDG-7 uban sa mga operatiba usab sa CIDG Bulacan nakadawat og impormasyong mamista ang suspek nianang adlawa hinungdan nga ‘namista’ usab ang mga polis sa silingan sa gipamistahan sa suspek, dihang kini nasigpatan gidakop nila kini.

Gikatahong naaktuhan sa suspek ang iyang asawa ug si Canunayon nga nag-sex sulod sa ilang lawak niadtong Hulyo 8, 1998 diha sa ilang balay sa Upper Casuntingan sa Mandaue ug iyaha silang gipamusil ug napatay.

Sa pakighinabi sa mga tigbalita sa suspetsado mihimakak kini sa maong alegasyon ug nangangkong didto siya sa Bulacan pagkahitabo ug mibiya na sa Mandaue sukad nagbuwag sila sa asawa Marso 1998.   (BANATNEWS)