4-lane nga dalan gi-inugorahan

CEBU, Philippines - Giinugorahan kagahapon ni Mayor Jonas Cortes sa dakbayan sa Mandaue ang P6.5 milyones nga Tabok Road widening project, ang unang upat ka lane nga barangay road sa dakbayan.

Ang maong karsada nga may gitas-ong 123 metros , 18 metros ang gilapdon ug may gibag-ong 12 pulgadas mosangko ngadto sa eskina sa North Road,

Matud pa ni City Engr. Antonio Sanchez nga ang maong proyekto maoy mosulbad sa problema bahin sa road right of way sa maong lugar.

Matud pa usab ni Engr, Peter Dy , sa PLD Construction nga maoy kontraktor sa maong proyekto nga gisugdan nila pagtrabaho ang maong proyekto niadtong Enero ning tuiga human makombinse ni Mayor Cortes ang mga apiktadong yuta ug mga balay sa maong lugar.

Sa iyang pagpamulong sa hamubong programa atol sa inugurasyon gipahayag ni Mayor Cortes nga ang maong proyekto makahatag og dugang kauswagan dili lamang sa barangay Tabok kundi sa tibuok dakbayan sa Mandaue.    (BANATNEWS)