Rock The Vote Concert diha sa Fuente Osmeña

CEBU, Philippines - Giatangan karon sa mga kabatan-onan dinhi sa Sugbo ang “Rock the Vote (RTV): Roadtrip to Change” concert karong gabii sa alas 7 sa gabii sa Fuente Osmeña rotunda.

Ang RTV usa ka concert caravan diin gawasnong makapadayag ang mga batan-on nga may hilig o interesado sa visual art, music, filmmaking, photography, mountaineering, skateboarding ug uban pa.

Kining linahi ug mamugnaong people power ug youth-oriented run gibase sa mensaheng ang gahum sa kausaban nagdepende sa kaandam sa pagpanginlabot sa kadaghanan.

Tuyo ug tumong sa maong caravan nga mamahimong luna sa mga tawong nagtuo ug gusto og kausaban nga pinaagi sa umaabot piniliay, mamahimo kining usa ka kalihukan diin ang mga tawo makapadayag sa ilang ‘creativity’ aron mabalik ang gahum sa kinabag-ang katawhan. Ang RTV maoy molangkob sa katapusang hunat sa pagpangampanya sa Liberal Party pinaagi sa mga kabatan-onan.

Sa pagtuo nga mopalapad ang kalihukan sa kaagresibo sa kampanya sa “yellow team” alang sa kausaban hulip sa gastuso ug pinundohan nga makinarya, ang Rock The Vote nakadawat og suporta gikan sa mga lokal nga grupo nga adtoan niini, sama sa Youth For Noy or YoNoy ug Pinoy Power.

Ang RTV gisugdan sa Pampanga ug gipadayon ngadto sa North Luzon ug padayunong ipahigayon sa Cagayan de Oro, People Power Monument sa Edsa ingon man dinhi sa Sugbo.

Ang mga inila na kaayo nga mga banda sama sa Parokya ni Edgar, Kamikazee, Hale, Moonstar88, Sugarfree ug uban pa ang mo-perform sa concert dinhi sa Sugbo karong May 3, 2010.

Ilang gitutokan dili ang mga gihimo sa mga kandidato aron modaog kun dili unsay mahimo sa ordi naryong mga tawo ngadto sa kandidatong nagrepresenta o gusto’g kausaban nga makadaog. Dili candidate-centered kun dili people-centered. (PR) (BANAT NEWS)