CEBU, Philippines - Kritikal ang kondisyon sa usa ka 33-anyos nga lalaki human kini gitagod og tigbas sa iyang silingan gamit ang pinote atol sa ilang panag-away kagahapon sa buntag diha sa sitio Baksihi, barangay Ocaña, dakbayan sa Carcar.
Ang biktima mao si Roel Lawas, residente sa lugar kinsa nakaangkon og mga samad tinigbasan sa lawas daling gidala sa iyang mga paryente ngadto sa Carcar District Hospital apan tungod sa kagrabe sa kahimtang niini gibalhin sa usa sa mga tambalanan sa dakbayan sa Sugbo.
Ang suspetsado mao si Melvin Natividad, 29, silingan sa biktima nga mitahan usab dayon sa mga tanod nga sila si Nicholas Roble, Rafael Dalumpineh ug Leonardo Aliser.
Si PO1 Jilmer Noval, duty desk officer sa Carcar Police Station sa pakighinabi sa Banat News mibutyag nga pag-abot nila ni SPO2 Jurame Tanod-tanod ngadto sa lugar ang pinote nga gigamit nga nabulit pa sa dugo mao ray ilang naabtan.
Matud usab ni Noval nga base sa ilang pasiunang imbestigasyon nga ang suspetsado ug biktima dugay na nga may personal nga panagbangi, mialegar ang suspek nga niadtong milabay’ng gabii giatangan siya sa biktima. – BANAT NEWS