CEBU, Philippines - Usa ka law undergraduate ang gidakop sa kapolisan gumikan sa pagpakaaron-ingnong abogado ug nang-notaryo gamit ang pangalan sa usa ka namatay nang abogado diha sa Catalino Ouano Street sa barangay Centro syudad sa Mandaue kagahapon pasado alas 10:30 sa buntag.
Ang giingong ‘abogado’ mao si Antonio de Real, residente sa Plaridel St. barangay Alang-alang sa dakbayan sa Mandaue nga tig-notaryo sa maong lugar nadakpan human makadawat ang kapolisan sa Mandaue og reklamo nga dili kini tinuod nga abogado.
Nasuta nga ang suspek migamit sa pangalan ni Atty. Sergio Monzolin Jr. nga matud pang de Real dugay nang namatay og iya kini nakaila kaniadto ug gigamit niya sa pagpang-notaryo sa mga affidavits.
Si de Real nagkanayon nga usa siya ka Law student kaniadto apan wala kini makahuman tungod sa kawad-on.
Sa pakighinabi sa Banat News ngadto kang PO3 Rommel Lim kinsa maoy nakasikop kang de Real nagkanayon nga dugay na silang nakadawat og reklamo.
Nakuha kang de Real ang ‘selyo’ nga “improvised dry seal” nga maoy iyang gamitong pangtatak sa mga dokumento. – BANAT NEWS