Pagbalhin sa petsa sa Labor Day gisaway

CEBU, Philippines - Hugtanong gisaway sa kahugpungan sa mga mamumuo dinhi sa Sugbo ang balaod nga gipatuman ni Presidente Gloria Arroyo pagsibog sa Labor Day celebration karung adlawa Mayo 1, unya na sa petsa 3 karung Lunes.

Gibutyag ni Winnie Badayos, chairman sa AMA Sugbo KMU Central Visayas atol sa interview sa Bantay Radyo angay gyud nga i-atol sa petsa 1 ang selebrasyon tungod kay makahuloganon kaayo kining maong petsaha.

Matud pang Badayos nga ang Mayo Uno gibuhisan og dugo ingon man kahago sa mga mamumuo pagpakigbisog kaniadto hinungdan nga milampos ang kasigurohan sa kahimtang sa pamuo pagsagop sa walo ka oras nga minimum trabaho matag adlaw ug makakobra na og overtime kadtong molapas sa maong oras.

Alang kang Badayos way kapuslanan ug wala nay significance ang Mayo Uno kun ibalhin og laing petsa.

Molusad og rally ang AMA-Sugbo KMU karung buntaga diha sa Estancia siyudad sa Mandaue aron magtuki sa kahimtang sa pamuo sa nasud ingon man sa iduso niining mga demanda sa gobyerno.

Partikular na niini ang kapakyas sa gobiyerno pagpatuman sa usbaw sa suholan sa mamumuo dinhi sa Central Visayas nga giduso ni Trade Union Congress of the Philippines kon TUCP representative Raymund Mendoza.

Sa iyang bahin, si Mandaue City councilor Victor Biaño, kandidato pagkakongresista sa ikaunom nga distrito misaway sa contractualization law sa pamuo gumikan sa dili pagka- makiangayon niini sa mga mamumuo.

Daghan kaayo intawon kaayo ang temporaryong nanginabuhi, makatrabaho man tuod pero kutob lang unom ka buwan kay contractual raman,” matud pang Biaño.

Sumala pa niini, niining paagiha walay kaugmaon ang mga kawani sa mga pribadong kompanya samtang ang mga kapitalista mao ray nabulahan kay gamay ra man ang ilang gastos sa mga benepisyo. – BANAT NEWS