CEBU, Philippines - Gatusan ka mga sakop sa Regional Mobile Patrol Group (RMG) miabot sa Cebu Provincial Police Office (CPPO) kagahapon sa buntag aron ipakatap sa tibuok lalawigan sa Sugbo alang sa Mayo 10 nga eleksiyon. Si Sr. Supt. Erson Digal, hepe sa CPPO mibutyag nga iyang ikatag-katag sa tibuok lalawigan ang mga polis sa dili pa ang eleksiyon.
Matud pa ni Digal nga adunay duha ka team nga iyang ipakatap sa lungsod sa Poro isla sa Camotes samtang ang mga pipila ka sakop sa 78th Infantry Batallion magbase usab sa lungsod sa San Francisco sa mao gihapong isla.
Midugang si Digal nga ang nahibiling 88 ka mga personnel maoy iyang i-apod-apod sa 11 ka lungsod ug duha ka siyudad nga iyang gipaubos sa election watchlist.
Butyag pa ni Digal nga posibleng aduna pay laing augmentation nga mahitabo sa lalawigan sa Sugbo. Gani iyang gilauman nga ang pipila ka mga miyembro sa Central Command, 78th IB, RTS mopuno pa nila og dugang personnel.
Sumala pa ni Digal nga ang mga personnel nga iyang ipakatap makadawat og allowance nga mokabat og tagsa ka libo kini isip pocket money atol sa adlaw sa eleksyon. – BANAT NEWS