CEBU, Philippines - Patay ang drayber nga napiit sa gimanehong multicab ug naangol usab ang tulo ka sakay niini sa miaging kaadlawon sa National Road, barangay Jagobiao, dakbayan sa Mandaue.
Ang namatay mao si Geromy Pautan, 37, taga barangay Pulpogan, Consolacion nga nagmaneho sa multicab ug gikasungag sa Estrada pick up nga gimaneho usab ni Geofrey Cloyd Laga, 22, taga dalan barangay Looc, Mandaue.
Naangol ang tulo ka mga sakay sa multicab nga sila si Carina Taneo, 55, taga Poblacion, Liloan, Allona Wagas, 40, taga Jugan, Consolacion ug Leonardo Gaviola Jr., taga Cogon, Poblacion, Liloan.
Si SPO3 Eleasar Saromines sa traffic section sa Mandaue City Police Office (MCPO) nga nahinabi sa Banat News miingon nga gikan sa dakbayan sa Sugbo ug paingon sa Liloan ang multicab. Gumikan sa kusog nga impact, ang mga karga sa multicab nangalagpot ug didto motugpa sa taxi nga gimaneho ni Andres Balijo, 55, taga Nangka, Consolacion.
Matud pa ni SPO3 Saromines nga gidala sa Mandaue City District Hospital ang mga biktima apan si Pautan gideklarar nga dead on arrival. – BANAT NEWS