Girapido, 1 patay, mabdos naangol

CEBU, Philippines - Patay ang usa ka batan-on samtang naangol ang usa ka babayeng mabdos human kini girapido sa wala pa mailhing mga mamumuno nga nagsakay og van pasado alas-7 sa milabay’ng gabii sa sitio Maraat, barangay Matab-ang, syudad sa Toledo.

Ang mga biktima mao sila si Junrel Resuelo Bayking, 18, ug Lovella Mae Garcia Mancao, 23, kinsa unom na ka buwang nagsabak ug pulos mga molupyo sa nahisgutang dapit.

Sa pakighinabi sa Banat News ngadto kang PO3 Thule Tahadlangit, kinsa maoy usa sa miresponde sa maong insidente, nag-estambay si Bayking sa dalan ug nakigtabi sa iyang mga higala daplin sa karsada niadtong tungura dihang kalit nga miabot ang usa ka puting L300 FB van.

Gikatahong mimenor kini og padagan dayong abli sa bintana pagtungod sa pundok ni Bayking ug dayong paarak sa wala pa matinong armas.

Si Mancao niadtong tungura diha duol sa grupo ni Bayking nga nagpaabot og bus dihang kalit nga girapido ug naapil sa naigo sa bala diha sa iyang buko-buko sa dayon niyang dagan.

Si Tahadlangit miasoy nga posibleng gipareglahan lang ang maong mga biktima ug base sa pamahayag sa mga kabanay sa mga biktima wala silay gikaaway.

Si Bayking nakaangkon og samad pinusilan sa walang bahin sa iyang ulo samtang si Mancao nga naigo usab sa buko-buko daling gidala sa Balamban District Hospital apan gipadala sila ni Dr. Rizalde Climaco, attending physician, sa tambalanan sa syudad sa Sugbo.

Apan wala na makaabot sa Sugbo si Bayking tungod kay nakabsan na kini sa iyang kinabuhi diha palang sa ambulansya. – BANAT NEWS