CEBU, Philippines - Ang abogado sa environmentalist group nga Greenpeace Volunteer, kinsa gikiha sa Kapitolyo tungod lamang sa pugusong pagsulod sa kontrobersiyal nga lote sa Balili sa barangay Tinaan, City of Naga niadtong nakalabay’ng bulan mitumbok nga mobalos usab sila og kiha batok sa gobernadora sa lalawigan sa Sugbu.
Sumala pa ni Cebu Environmental Lawyer Atty. Benjamin Cabrido, nga maoy personal nga mangabugar sa mga batan-on nga miyembro sa Greenpeace International nga gikiha sa Kapitolyo og trespassing, nga muduso sila og motion to quash ngadto sa korte aron hingpit nga ibasura sa korte ang kasong gipasaka ni Gov. Gwendolyn Garcia.
Gihulagway ni Cabrido nga ang kaso sa Kapitolyo usa lamang ka matang sa pagpangharas ug usa ka "display of arrogance in power" sa gobernadora.
Kini aron hadlokon silang mga environmentalists nga mibahad mopasaka og kasong Writ of Kalikasan ngadto sa Korte Suprema batok sa gobernador may labot sa kontrobersiyal nga pagpalit sa Kapitolyo sa Balili properties sa Tinaan, City of Naga ug ingon man ang pag-discourage sa mga tawo nga magpakabana sa pagprotektar sa kalikupan .
“Kun makit-an sa korte nga usa kini ka harassment suit sa Kapitolyo aron pag-discourage sa publiko sa pagpakabana sa kalikupan, mosumbalik mi’g kiha,” sigon pa ni Cabrido.
Nagplanong mopasaka og laing kasong civil, criminal ug administratiba batok sa gobernadora ug mga kaubanan ang environmentalists.
Gikwestyon ni Cabrido maong kaso tungod kay dili man usa ka pribadong propiyedad ang lote kay gipalit naman kini sa Kapitolyo.
Sumala pa niini sigon sa balaod ang mga government properties bukas kini sa publiko ilabina og usa ka timber land sama sa Balili lot.
Sa iyang bahin, si Capitol Consultant on Information Atty. Rory Jon Sepulveda nagkanayon nga wala sila mahadlok sa bahad sa mga environmentalists ug andam ang gobernadora nga moatubang sa mga kaso.
Pabiling gibarogan ni Sepulveda nga walay nahimong kasaypanan ang gobernadora.
Kiha ni Rama gikwestyon ni Tiongko
Ni Lesley Caminade
Gihiklad kagahapong adlawa ang unang ebidensya ni Cebu City councilor candidate James Philip “Jimboy” Tiongko kabahin sa kaso nga gipasaka ni mayoralty candidate Michael Rama.
Si Tiongko mipakita sa mga tigbalita sa mga ebidensyang dili gani siya mismo maoy unang mihingalan kang Rama nga drug protector kondili si Mayor Tomas Osmeña mismo maoy mihimo niini.
Gipakita ni Tiongko ang usa ka pamantalaang gihinganlan sa mayor si Rama nga ‘drug lord protector.’
Uban niini mao ang usa ka hulagway ni Rama nga nagsuot kini og basketball uniform ug maoy guest speaker sa usa ka basketball tournament nga gi-esponsoran ni Tata Negro nga karon kandidato usab sa pagkakonsehal sa dakbayan.
Samtang gikwestyon ni Tiongko ug nganong wala pasakai ni Rama ang mayor nga mao man unta ang unang mitawag niini og drug protector ug dihang siya (Tiongko) na maoy mihingalan kang Rama gikiha siya dayon niini.
Mipasabot si Tiongko buot lamang niyang ipagawas ang kamatuoran ug karon hasta ang media giduhig ni Rama sa gipasakang kaso nga igo rang nagpaabot og mensahe sa publiko.
Gihulagway ni Tiongko nga ang gihimo sa mayor daw pinaakan og lion apan wala masuko si Rama, karong siya nga susama ra og hulmigas mitiyabaw na si Rama.
Samtang mipahimangno usab si Tiongko ngadto kang Osmeña nga magbinantayon kang Rama tungod kay moabot unya ang panahon nga siya na usab ang pasakaan og kasong libelo niini. – BANAT NEWS