Jobs Fair sa Mayo 1 ipadayon sa DOLE

CEBU, Philippines - Bisan paman kun giuswag sa Malacañang ang kasaulogan sa Labor Day karung Lunes bisan ang orihinal niining kasaulogan ugma untang adlawa, ang Department of Labor and Employment (DOLE)-7 mopadayon sa nahan-ay na nilang mga kalihokan sumala pa ni assistant regional director Esequil Sarsauga.

Matud pa ni Sarsauga apektado ang pipila ka mga kalihokan sama sa pagpahigayon sa local job fair dinhi sa dakbayan ug Metro Cebu kun sa Lunes pa nila kini himuon sanglit naka-schedule naman kini sa mga venues.

Gipaabot nga liboang walay mga trabaho ang modagsa unya sa ilang jobs fair ugmang adlawa.

Samtang sa pikas bahin, ang Associated Labor Union (ALU) nasagmuyo sa DOLE gumikan sa kapakyas paghatag sa ilang gipangayong usbaw sa suholan sa mga mamumuo dinhi sa dakbayan sa Sugbu ug ubang bahin sa tunga-tungang kabisay-an.

Si Raymund Mendoza representante sa ALU-TUCP nagkanayon nga nakasinati og kalisdanan ang mga anak sa mga mamumuo tungod sa kamahal sa nag-unang palaliton ug sa kapakyas sa gobiyerno pagpadali sa duha ka petisyon nga gisang-at sa duha ka labor sector diin ang una mao ang ALU-TUCP ug ang ikaduha nga petisyon nga gisang-at sa Alliance for Progressive Labor. – BANAT NEWS