8 polis sa Lapu gipasidunggan

CEBU, Philippines - Gipasidunggan sa konseho sa dakbayan sa Lapulapu ang walo ka mga polis lakip na si Sr. Supt. Mariano Natu-el tungod sa pagkasakmit sa usa ka kilong cocaine ug pagkasikop sa drug pusher sa Burungan, Samar sa milabay’ng bulan sa Pebrero ning tuiga.

Ang gipasidunggan kauban ni Natu-el mao sila si Sr. Insp. Ceferino Tabay Jr., Sr. Insp. Joeson Parallag, Chief Insp. Gerald Suquib, SPO4 Rex Cabrera, SPO1 Arnel Vender, PO1 Michael Rubia ug PO1 Francisco Rustia.

Ang walo gihatagan og Medalya ng Kagalingan (PNP Medal of Merit) tungod sa pakiglambigit sa operasyon batok kang Vedasto Jubahib Corsiga nga unang gi-report nga nag-operate sa dakbayan sa Lapulapu ingon man sa Bohol.

Ang walo ka mga polis una nang gipasidunggan niadtong Marso 4 sa Police Regional Office 7 sa “Medalya ng Kagalingan” (PNP Medal of Merit) pinaagi ni PRO 7 Regional Director Chief Supt. Lani-O Nerez.

Gihangop ni Natu-el ang maong pasidungog ug mihulagway nga makapataas kini sa moral sa kapolisan aron molihok sa ilang trabaho.

Si Corsiga nasikop sa kapolisan sa Regional Intelligence Division (RID), Lapulapu Police Office ug sa Philippine Drug Enforcement Agency- 7 niadtong Pebrero 27, 2010 sa Burungan, Samar human makadawat og impormasyon ang kapolisan sa Lapulapu gikan sa usa ka sakop sa Barangay Intelligence Network o BIN nga adunay namaligya og Cocaine sa dakbayan sa Lapulapu. – BANAT NEWS