Misuway'g bangga sa enforcers sikop

CEBU, Philippines - Gisikop sa kapulisan ang usa ka drayber sa multicab nga pasaheroan tungod sa giingong pagsuway niini og bangga sa mga traffic enforcers diha sa National Highway, lungsod sa Minglanilla kagahapon sa buntag.

Ang suspetsado giilang si Alejandro Cantilla Baracuelle, 24, taga Poblacion, lungsod sa Moalboal ning dakbayan nga namasahero sa rotang San Fernando-Pardo.

Matud pa ni SPO1 Romeo Barde dihang nahinabi sa Banat News ang maong drayber mihunong kini sa lugar nga ‘no stopping area’ hinungdan nga gipitohan sa traffic enforcer nga si Eduardito Fernandez, 49.

Kuyog ni Fernandez ang laing traffic enforcer nga si Alfredo Caparas Jr. apan gikatahong nasuko ang suspetsado ug mipabulhot hinuon sa iyang sakyanan padulong ni Fernandez.

Daling nakalikay si Fernandez palayo sa sakyanan ug diha-diha kalit nga mipaturatoy padagan ang suspek palayo hinungdan nga mitawag og backup sa kapolisan ug diha maabti ang suspek sa unahan tungod sa pagkatanggong sa kahuot sa trapiko.

Dugang pa ni SPO1 Barde nga ang maong drayber nadakpan na ni Fernandez ug naisyuhan og Temporary Operators Permit (TOP) niadtong milabay’ng adlaw sa susamang lugar ug ilang gituohan nga nagdumot kini sa maong traffic enforcer. – BANAT NEWS