Mandaue milambo, bisan sa 'maniobra' sa konseho

CEBU, Philippines - Gihimakak ni Mandaue City Administrator Briccio Boholst ang alegasyon sa oposisyon nga dili stable ug alkanse ang ekonomiya sa siyudad tungod kay nadoble pa ang mga mibubo og puhonan sa ilang dakbayan sulod sa lima ka tuig.

Matud pa niya moabot P30 bilyones nga kapital ang misulod sa siyudad nga miresulta sa paspas nga paglambo sa dakbayan ubos sa administrasyon ni Mayor Jonas Cortes. Sa gipagawas nga dokumento sa city administrator, gikan sa P28 bilyones misaka kini sa P35 bilyones sa termino ni Cortes ug gihulagway kini ni Boholst pagmatuod lang kining misalig ug kompyansa ang mga negosyante sa panahon ni Cortes.

“It is wrong to say that the present administration has failed to deliver project out of the P2.8 billion budget of the city mayor since he assumed post. The opposition is good in telling lies,” matud pang Boholst.

Mipasabot usab si Boholst nga tinuod dunay kinahanglang galastuhan may kalambigitan sa pagserbisyo sa katawhan nga nagkulang og pundo apan bisan paman sa gihulagway niining pagmaniobra sa konseho nakapangita og paagi ang dakbayan. – BANAT NEWS