German napusilan sa sampot, negosyo gisusi

CEBU, Philippines - Nalandig sa tambalanan ang usa ka negosyanteng German national human gipusil sa wala mailhing lalaking nag-atang kaniya kagahapon sa hapon sa sitio Paula Maria barangay Inayawan.

Ang naangol mao si Zarko “Freddy” Ljiljak, 44, negosyante og fashion accessories, molupyo sa maong lugar nakaangkon og samad pinusilan sa tuong sampot.

Gipangita pa sa kapolisan ang gikatahapan nga gihulagway nga itomon, nagsuot og bull cap, dark t-shirt ug nagsul-ob ug camouflage short.

Sa pakighinabi sa Banat News ni PO3 Geoffrey Gutual mibutyag nga sakay ang biktima sa iyang XR-200 nga motorsiklo dihang gibabagan sa gikatahapan ug gipusil lima ka higayon.

Si PO2 Lauron Raganas sa Mobile Patrol Group nga off-duty na niadtong tungura ug nagpuyo sa maong dapit daling misusi sa gihitaboan apan nakaikyas ang mamumuno.

Ang biktima daling gidala sa Miller Hospital. Nagtuo ang kapolisan nga may kalambigitan sa negosyo ang pagpamusil. Gisusi na karon ang kabahin sa impormasyong nagka-sumpakiay kini sa iyang kasosyong German gihapon.  – BANAT NEWS