Lola napunggit sa motorsiklo patay

CEBU, Philippines - Patay ang usa ka 66-anyos nga lola nga nalamba sa karsada dihang nadasmagan og motorsiklo sa national highway sa barangay Pakigne lungsod sa Minglanilla kagahapon sa alas 5:00 sa buntag.

Ang biktima nga patay nang nadangat sa tambalanan mao si Endriquita Lopez Dumit-ig, 66, molupyo sa Lower Pakigne, Minglanilla samtang ang drayber sa motorsiklo nga nakadasmag kaniya mao si Arnie Tapales Gerabolo, taga Basdiot lungsod sa Moalboal.

Matud pa ni PO1 Angelo Arnaiz sa Minglanilla Police dihang nahinabi sa Banat News ang motorsiklo gikan sa lungsod sa Moalboal paingon sa dakbayan sa Sugbo nga kusog kaayo ang dagan.

Pag-abot sa maong lugar wala kini makabantay sa biktima nga milabang sa karsada hinungdan nga na-apikihan na og hunong ug nadasmagan gyud ang biktima. Giingong nabunal ang ulo sa biktima sa sementadong karsada ug daling gihatod sa Minglanilla District Hospital apan gideklarar nga dead on arrival tungod sa kadaot sa ulo niini nga giingong naliki.

Samtang ang drayber sa motorsiklo boluntaryong mitahan sa iyang kaugalingon ug nagtingkagol na sa karsel samtang gihikay ang kasong ipasaka niini sa korte. - BANAT NEWS