Rugby boy giluba naangol

CEBU, Philippines - Usa ka menor de edad kinsa giingong tiggamit og rugby gidunggab angol sa wala pa hiilhing kriminal didto sa dalan F. Ralota, syudad sa Danao sa miaging gabii.

Ang biktima giila lang nga si Boy (dili tinuod nga ngalan) 17, nga taga   Purok 4, barangay Tuburan Sur sa nahisgutang dakbayan.

Si SPO4 Jose Salingua sa Danao Police Station mibutyag sa Banat News nga naglakaw pauli sa ilang balay ang biktima dihang kalit lang mitunga ang wala hiilhing tawo nga armado ug sa walay hinungdan giluba siya niini.

Gibutyag usab sa kapolisan nga ang biktima kanunay nga maghingos og rugby uban sa mga barkada niini diha sa F. Ralota ug gani kanunay lang magkaguliyang ang maong lugar gumikan sa kadaghang adis-adis nga magrambol.

Ang biktima kinsa samdan sa buko-buko gihatod dayon sa Vicente Sotto Memorial Medical Center sa dakbayan sa Sugbo, samtang padayon pang gipangita sa kapolisan ang nakaluba niini.   (BANATNEWS)