CEBU, Philippines - Mga Youth Community Scouts sa siyudad sa Sugbu sakay sa walo ka mga Kaoshiung buses ang ‘gitanggong’ og pipila ka oras sa kapolisan gumikan kay giingong nakalangay ang convoy ni Gob. Gwendolyn Garcia mga alas 12:30 sa udto sa lungsod sa Barili.
Ang YCS community social worker sa Cebu City nga si Pablita Abling Toring maoy kuyog sa 400 ka kabataan sa siyudad sa Sugbu padulong unta motambong sa ilang tinuig nga camping sa Badian.
Nanawag sa programang Banat Sugbu sa DyRF pinaagi ni komentaristang Tony Erap Avila ug Arnel Bacalan kabahin sa pipila ka oras nga pagkatanggong sa mga bata.
Sumala pa ni Toring nga gikan sa alas 12:30 sa udto ug gibuhian pagka-alas 3:00 na sa hapon, gikatahong gipanggutom ang mga bata tungod kay wala pa makapaniudto.
Apan samtang sila nagbiyahe diha sa lungsod sa Barili giingong nakadungan nila ang convoy ni Gob. Gwendolyn Garcia nga may kaubang mga polis ug mi-overtake sa ilang bus dayong gibabagan ang ilang agianan.
Sumala pa niini nangalisang ang mga bata sa gibuhat sa mga polis ilabi na dihang gidala sila ngadto sa police station ug gisukitsukit ang mga papeles sa sakyanan ingon man ang ilang pagsuroy-suroy.
Ang hepe sa kapolisan sa lungsod sa Barili nga si Chief Insp. Alexander Soledad dihang gitawgan sa DyRF nagdumili pagtubag sa rason nga nagpadayon pa ang ilang pag-imbestigasyon.
Sa report sa Balitang Bisdak kagahapon gikatahong si Soledad nangangkong ilaha kining gihimo gumikan sa pagpatuman sa seguridad usa na niini ang pagpanakop sa mga sakyanang walay dokumento ug nasuta nga ang maong mga bus walay plate number. (BANATNEWS)