P5M ang gahin para nasunogan

CEBU, Philippines - Hingpit nga giaprobahan sa mga sakop sa konseho sa dakbayan sa Mandaue ang pagpagawas sa P5 milyones nga kantidad alang sa mga biktima sa sunog sa sitio Aroma sa barangay Subangdaku, sa maong dakbayan atol sa regular session nga gihimo sa konseho sa dakbayan nga gipangulohan ni Bise Mayor Carlo Fortuna.

Si Konsehal Emiliano Rosal nga maoy chairman sa committee on budget and appropriation sa konseho maoy nangamahan sa resolusyon nga naghatag og pagtugot kang Mayor Jonas Cortes sa pagpagawas sa maong kantidad nga kuhaon gikan sa calamity fund karong tuiga.

Gipasabot ni Konsehal Rosal nga ang kaakohan sa konseho mao ang paggahin og salapi gikan sa pundo sa calamity fund ug kaakohan na sa executive department ang pagpatuman niini.

Ang maong gahin maoy kuhaan og hinabang alang sa mga biktima sa sunog pinaagi sa pagpalit og mga housing material nga mobalor og P10, 000 alang sa tag-iya sa balay nga naugdaw, P5,000 alang sa balay nga igo lang nakan-an sa kayo, ug uban pa.

Dugang giuyonan sa konseho mao ang resolusyon ni Konsehal Victor Biano nga naghangyo sa pamilyang Tanchan nga hatagan una og lugway ang pagpuyo sa mga biktima samtang nagita pa og luna ang kagamhanan aron kabalhinan nila.

Sa laing bahin, si Kongresista Nerissa Soon Ruiz sa ikaunom nga distrito kinsa magpapili usab sa pagka-mayor sa dakbayan sa Mandaue karong Mayo 10 nga election nagkanayon nga may mga plano na siyang maayo alang sa mga nabiktima sa sunog.  – BANAT NEWS