14-anyos gilugos sa kanhi kapuyo sa mama

CEBU, Philippines - Nagtingkagol sa karsel sa Mabolo Police Station ang usa ka lalaki human kini gikatahong milugos sa iyang 14-anyos nga hinablos sa makadaghan na nga higayon diha sa ilang balay sa usa ka subdivision barangay Kasambagan ning dakbayan.

Ang 48-anyos nga suspect usa ka stay-in construction worker ug kapuyo sa inahan sa biktima (mga pangalan gipugngan sa Banat News aron panalipdan ang biktima).

Sumala pa ni Sr. Insp. Pablo Cabildo ang officer in-charge sa Mabolo Police Station sa pakighinabi sa Banat News mibutyag nga gikuyogan sa tanod sa barangay Kasambangan ang agalon sa biktima pagdangop diha sa ilang buhatan.

Ang kapolisan daling miadto sa gipuy-an sa biktima ug diha nila kini maabting naghilak, ang suspetsado ila ra usab dayun nga gisikop.

Gikatahong nag-abot ang biktima ug ang suspek sa trabahuan niini sa Labogon sa syudad sa Mandaue, nianang pagkagabii gikatahong gilugos sa suspek ang hinablos sulod sa ilang bunkhouse.

Mitug-an ang bata nga dili lang kadto maoy unang higayon nga gilugos siya sa suspek sanglit niadtong Pebrero 11 ug Pebrero 12 gipahimuslan usab siya niini sa balay sa ig-agaw niini.

Ang suspek dihang gikahinabi sa Banat News nangangkong uyab sila sa biktima ug wala niya kini lugosa tungod kay sinabutan nila ang pakighilawas.

Sumala pa sa suspek nga tulo ka buwan na silang nagkabuwag sa inahan sa biktima apan padayon siyang misuporta niini tungod kay aduna silay duha ka anak. – BANAT NEWS