CEBU, Philippines - Sa kabalakang maapil sa pagkasunog milayat ang usa ka drayber gikan sa iyang gimanehong ambulansiya dihang miulbo ang likod nga bahin sa maong sakyanan samtang nagbiyahe niadtong Sabado sa gabii diha sa barangay Tonggo lungsod sa San Fernando.
Si PO1 Lauro Laurel sa San Fernando Police Station assistant investigator sa maong insidente miila sa nahisgutang drayber nga si Glen Laranjo, 27-anyos residente sa maong lugar.
Matud ni Laurel nga si Tonggo nagbiyahe gikan sa Rural Health Unit sa barangay Poblacion ug sa pag-abot niini diha sa lugar nga nahitaboan dunay kalit nga mibuto sa likod sa ambulansiya.
Dihang iyang gilingi pagsusi kun unsa kini miulbo na ang kalayo ug sa kahadlok nga masunog siya sa pag-apil milayat siya gikan sa sakyanan.
Matud pang Laurel nga ang maong ambulansya dili iya sa gobiyerno o sa lungsod kundili personal kining sakyanan sa ilang mayor nga si Lakambini “Neneth” Reluya nga gipaggamit sa lungsod.
Ang mga residente nga diha sa lugar nga nakakita sa hitabo mao nay mitawag ngadto sa police station, ang kapolisan maoy mitawag og bombero apan pag-abot sa mga bombero naugdaw na ang nahisgutang sakyanan hinuon walay mga naangol sa maong hitabo.
Si Laurel midugang nga base sa gipahigayong imbestigasyon sa kabomberohan faulty electrical connection duol sa baterya nga nahimutang sa likod nga bahin sa sakyanan ang maoy hinungdan sa pagkasunog niini. – BANAT NEWS