CEBU, Philippines - Ang grupo sa Liberal Party sa dakbayan sa Talisay dunay bag-ong slogan diin nalakbit niini ang pangalan sa kontrobersyal nga sinagop sa mayor sa siyudad nga si Joavan Fernandez.
“A vote for Soc is a vote for Joavan” slogan ni kanhi Bokal Raul Bacaltos nga mikandidato sa pagkamayor sa dakbayan sa Talisay atbang ni incumbent Mayor Socrates Fernandez.
Si Bacaltos nga nahinabi kagahapon sa Banat News miangkon kabahin sa mao niyang slogan diin matud pa niini nga ibutang lang nga balihon ang sitwasyon diin si Joavan ang nahimong makaluluoy tungod kay wala kini matarong og amoma ug disiplina sa mayor.
Gipasanginlan ni Bacaltos si Fernandez wala kini maglantaw sa kaayohan ni Joavan tungod kay sigehan lang niini og dupa ang sinagop matag makabuhat og mga kalapasan hinungdan nga miabuso na kini.
Ang nahisgutang slogan ni Bacaltos mao kini ang kanunay niyang ibandilyo matag gabii sa ilang pagpahigayon og rally.
Sa laing bahin, gihimakak ni Bacaltos nga ang ilang grupo maoy nag-download ngadto sa internet sa mga distorted nga video sa siyudad apan mikwestiyon kini kung asang partiha sa video ang ilang giguba nga ang gipakita nila sa video kamatuoran lamang.
Sa maong video sa oposisyon dunay gipakita ngadto nga basura nga naghuot diha sa kanal ug sapa sa mga lugar sa siyudad ug ang wala pag-implementar hangtud karon sa Comprehensive Master Drainage Plan sa siyudad diin migasto na kini og minilyon sa pagpahimo og plano sa usa ka consultancy firm. – BANAT NEWS