Namatay sa 'gakos sa mama

CEBU, Philippines - Usa ka inahan nga gikatahong na sakit sa pangisip ang miunay pagpatay sa iyang kaugalingong 3-anyos nga anak babaye pasado alas-4 sa kaadlawon sa sitio Kamang-kamang barangay Ocaña syudad sa Carcar.

Kasamtangang gitanggong ang 42-anyos nga suspek (pangalan gipugngan sa Banat News) sumala pa ni PO2 Paulino Sanchez, ang imbestigador sa Carcar Police Station sa pakighinabi sa Banat News.

Matud pang Sanchez base sa pamahayag sa 14-anyos nga igsuon sa biktima, nianang pagka-alas-7 sa gabii gitapok sila sa ilang inahan, ang iyang manghod (biktima) gihalog-halog niini og hugot.

Gikatahong gimandoan sila sa ilang inahan nga atubangon ang altar ug paampuon tungod kay adunay mokuhang ‘abat’ kanila. Samtang sila nag-ampo gibulibod sa iyang inahan ang manghod og habol ug gihalog-halog og hugot.

Human niini gisulod pa gyud sa inahan ang iyang manghod diha sa iyang gisuot nga t-shirt ug gi-uboan diha sa salog samtang nagpunay og yawyaw nga naay mokuha sa iyang anak.

Sumala pang Sanchez, nadunggan nalang sa 14-anyos ang manghod nga miingon “Ma, mamatay na gyud ko ani ma. Dili nako kaginhawa.” Apan wala lamang panumbalinga sa inahan ug gipadayon ang iyang gibuhat.

Ang 14-anyos wala lamang usab mopakgang sa inahan gumikan kay niadtong tungura naggunit kini og kutsilyo, wala lang usab siya mosiyagit sa kahadlok nga dunggabon siya sa iyang inahan.

Nianang pagkakaadlawon, nabantayan niyang wala na magginhawa ang iyang manghod ug nasuta niyang nagmata pa gihapon ang iyang mama nga naggakos sa iyang manghod. Sumala pa niya nga wala siya makagawas tungod kay gitrangkahan sa inahan ang ilang pultahan.

Pagkabuntag matud pang Sanchez, ang mga silingan nahibulong nganong wala pa gihapon nila makit-i ang manag-inahan hinungdan nga nanawag sila og mga kabanay sa pamilya ug tanod nga si Inocencio Caballes.

Si Caballes inabagan sa kabanay sa pamilya mipugos og abli sa pultahan ug mao nalay ilang naabtan ang bata nga giputos og habol ug patay na hinungdan nga mitawag sila og polis.

Sila si Sanchez pag-abot sa dapit midala dayon sa bata ngadto sa tambalanan apan gideklarar kining dead on arrival.

Ang amahan sa bata kinsa nagtrabaho nianang adlawa sa Alcoy mibutyag kang Sanchez nga wala sila mag-away sa iyang asawa ug tarong kaayo ang huna-huna niini atol sa iyang paglakaw, apan kini mitug-an nga nerbiyosa ang iyang kapikas. Base sa ilang obserbasyon sa inahan sa bata, si Sanchez nagkanayon nga daw wala kini sa iyang kaugalingon ug nagsige og siyagit. Dihang nakit-an sa suspek ang bana gitawag niya kining ‘abat.’

Walay plano ang pamilya nga mosang-at og kaso batok sa suspek samtang dili usab sila motugot nga ipa-awtopsiya ang patay’ng lawas sa bata apan ang kapolisan mopailawom sa suspek sa usa ka psychiatric test aron pagsusi kun tinuoray’ng nalisoan kini sa pangisip. – BANAT NEWS