Mipatay sa fixer wala pa ilhi

CEBU, Philippines - Kapolisan sa dakbayan sa Talisay wala pay nahipos nga impormasyon kabahin sa wala mailhing kriminal kinsa mipusil patay sa usa ka fixer sa Land Transportation Office (LTO) niadtong Biyernes sa hapon sa sitio Bapaka, barangay Pooc, dakbayan sa Talisay.

Si PO2 Jundave David kinsa usa sa mga imbestigador sa maong hitabo nga nahinabi sa Banat News nagkanayon nga wala pay matumbok nga suspetsado sa pagpusil patay kang Loreto Lapingcao.

Matud ni David nga dihang nahitabo ang insidente dunay mga tawo diha sa lugar apan walay mikooperar kanila.

Wala pa usab nila ma-estorya ang asawa ni Lapingcao aron makuhaan nila kini og mga pamahayag tungod kay nag-atiman pa kini sa patay’ng lawas sa iyang bana.

Apan gibutyag ni David nga sa ilang pasiunang imbestigasyon nakadawat sila og report nga gawas nga dunay naglagot kang Lapingcao tungod kay giingong i-‘tambling’ niini ang kwarta sa ubang mga misugo kaniya og parehistro sa sakyanan daghan usab kini og nakaaway.

Si David midugang nga dili lang ang kabahin sa trabaho ang ilang gitutokan karon nga motibo sa pagpatay sa biktima kundili lakip na personal.

Si Lapingcao gikan pa sa LTO sa barangay Lawaan I paingon nang mopaulidihang gipusil sa duha ka wala mailhing lalaking luwan og pula nga motorsiklo. – BANAT NEWS