CEBU, Philippines - Nakabsan sa kinabuhi ang usa ka Amerikano human mabangga sa puthaw nga railings kilid sa karsada ang iyang gimanehong motorsiklo pasado alas-10 sa buntag sa milabay’ng adlaw didto sa sitio Dapdap, barangay Tugas, lungsod sa Badian. Ang namatay giilang si Mark Anthony Hermreck, 51, kasamtangang nagpuyo barangay Poblacion West, lungsod sa Moalboal.
Sigon sa pakisusi sa kapolissan sa Badian nga pinanguluhan ni SPO1 Aguanta, traffic investigator, nagmaneho si Hermreck sa motorsiklo padulong unta sa Badian District Hospital aron magpakonsulta.
Tungod sa labihang kakusog sa pagpadagan wala niini makontrolar ang motorsiklo samtang nagliko sa kurbadahong dalan sa nahisgutangbarangay ugnabangga sa railings ug nabunal sa poste sa kuryente.
Ang biktima nakahiagom og dakong samad sa agtang ug nalup-og sa sementadong karsada.
Ang mga boardmate sa biktima lakip na si Dr. Mechelle Tejero nga napahibalo sa hitabo daling miadto sa nahitaboan ug mihatag og first aid kaniya.
Gidala sa Badian District Hospital ang biktima apan wala magdugay namatay kini samtang gitabang ni Dr. Emeldo Gamallo.
Sa laing bahin, naangol usab ang usa ka menor de edad human kini mabangga-e sa usa ka awtong gimaneho sa usa ka pari pasado alas-7 sa gabii sa milabay’ng adlaw sa barangay Banhigan, sa susamang lungsod.
Ang bata mao si Ramon Purgatorio Calabroso, 5, molupyo sa nahisgutang barangay. Samtang ang nakadasmag kaniya mao si Fr. Roldan Pacilan Tayactac, 40, ang kura paruko sa usa ka simbahan sa lungsod sa Moalboal.
Ang pari gikatahong padulong na sa Moalboal apan pag-abot sa maong dapit wala kini makabantay sa kalit nga pagtabok sa biktima hinungdan nga nadasmagan kini.
Nakahiagom og daghang bun-og ug samad sa kalawasan ang biktima tungod sa pagkalamba niini sa aseras sa karsada ug gidala sa Badian District Hospital ug gibalhin sa Vicente Sotto Memorial Medical Center. – BANAT NEWS