CEBU, Philippines - Ang kapolisan sa dakbayan sa Talisay padayon pang nag-imbistigar bahin sa gipamusil nga tulo ka tawo kinsa duha niini giingong mga tulisan, mangunguot ug tingpanglabni sa butang sa mga pasahero sa mga jeep pasaheroan diha sa barangay Tabunok sa nahisgutang siyudad.
Sila si Jomel Obeso, 26, taga sitio Ilang-ilang, barangay Lagtang, Joel Empuerto, 27, taga sitio Sombrea, Lawaan I ug ang ig-agaw niining si Warlito Empuerto, 21, residente usab sa sitio Sombrea, Lawaan I, pulos sa dakbayan sa Talisay gipamusil sa wala hiilhing armadong mga tawo niadtong Martes sa gabii sa barangay Lagtang.
Si Obeso samdan sa tuong dughan ug abaga samtang ang manag-agaw samdan usab sa ilang tuong paa ug walang tiil.
Ang tulo gidala dayon ngadto sa Talisay City District Hospital apan gibalhin ngadto sa Vicento Sotto Memorial Medical Center.
Si PO2 Leandro Azarcon mibutyag sa Banat News nga si Obeso ug Joel maoy nalambigit sa mga tulis, kuot ug labni sa mga pasahero sa sakyanan diha sa Tabunok ug gani si Joel kanunay na nilang nadakpan sa kasong panulis.
Si Azarcon nagkanayon nga gitutokan nila ang anggulo sa posibleng pagdumot maoy hinungdan nganong gipangluthang ang mga biktima.
Nasayran nga sa milabay'ng tulo na ka buwan si Joel adunay gikapinusilay didto sa tubaan sa merkado sa Tabunok nga usa usab ka giingong tulisan.
Sa maong pinusilay si Joel maoy nasamdan samtang ang iyang kontra miikyas dayon human sa insidente.
Gituohan sa kapolisan nga mao ra gihapong kontraha ni Joel ang buot malagmit mopausab sa iyang birthday. (BANATNEWS)