36 ka balay naugdaw; usa gikulata

CEBU, Philippines - Naugdaw ang 36 ka mga panimalay sa nahitabong sunog sa sitio Cagudoy, barangay Basak dakbayan sa Lapulapu kagahapon sa sayong kabuntagon nga midanyos og P600 mil.

Sa pasiunang imbestigasyon ni Lapulapu City Fire Marshal Chief Insp. Ricardo Cornelio ang maong kabalayan ginama sa kahoy ug nagsikitsikit hinungdan sa dali nga pagkatap sa kalayo niini. Sa imbestigasyon ni FO1 Climaco Salisid nasutang nagsugod ang kalayo sa panimalay ni Judy Apolisnar nga iyang gipaabangan ngadto sa usa ka Toto Alcon nga trabahante sa MEPZA.

Si Alcon gikulata sa mga tawo gumikan sa pagkasunog sa ilang kabalayan ug daling miikyas paglikay sa nangasukong silingan. Gikatahong diha magsugod sa kusina ni Alcon ang sunog ug gisuwayan unta nila pagpawong apan midako gihapon ang kalayo.

 Nagduda si Salisid nga posibleng dunay nag-overheat nga appliances gikan sa giabangang lawak ni Alcon.

Matud pa ni Cornelio nga naglisod ang fire trucks pagsulod sa maong dapit maong ilaha nalang gisumpaysumpay ang ilang mga hose.

 Ang sunog gialarma alas 5:44 sa kaadlawon human usa ka Marina Lopez ang mitawag ug gipaubos kini dayon sa task force Alpha, human sa tulo ka minutos nakontrolar kini sa mga bombero. (BANATNEWS)