Pekeng 'Tung-Hai' food supplement gisakmit

CEBU, Philippines - Mga pekeng fish liver oil gisakmit sa mga sakop sa Criminal Investigation and Detection Group-7 kagahapon gikan sa duha ka mga dagkong tindahang namaligya niini dinhi sa dakbayan.

Ang grupo ni Sr. Insp. Ricky Neron, mibutyag sa mga tigbalita nakadawat sila og reklamo sa nag-inusarang distribyutor sa Tung-Hai Fish Liver Oil ug Tungh-Hai Emulsion Fish Liver Oil kabahin sa pagpamaligya sa duha ka tindahan diha sa Colonade Mall sa dalan Colon ug North Reclamation Area nga walay permiso kanila.

Nakuha sa mga sakop sa CIDG-7 ang 154 ka paketeng Tung-Hai fish liver oil ug 27 ka botelyang Tung-Hai Emulsion. Matud pang Neron, ang mga capsules gidudahang peke gumikan kay dili mao ang packaging niini samtang ang binotelyang emulsion walay pagtugot gikan sa distribyutor ang maong mga tindahan nga makabaligya niini.

Si RTC Branch 11 Judge Ramon Daomilas Jr. miisyu og search warrant batok sa maong mga tindahan. Ang kapolisan gikatakdang mopasaka og kaso batok sa mga tag-iya sa maong mga tindahan nga wala madakpi sa paglapas sa Section 170 ug Section 155 sa Akta Republika 8293(BANATNEWS)