CEBU, Philippines - Giila na sa Bureau of Jail Management and Penology (BJMP)-7 ang mga dagkong bilanggoan dinhi sa tunga-tungang Kabisay-an nga ilang butangan og special polling precincts aron makabotar ang kapin 6,000 ka mga piniriso atol sa eleksyon.
Si Atty. Dennis Aliño, ang pangulo sa legal division sa BJMP-7 nagkanayon nga dinhi sa Sugbu, lakip sa butangan mao ang Cebu City Jail nga adunay kapin 600 ka detainee ang rehistradong botante.
Samtang tag 400 ka piniriso usab ang sa Mandaue City Jail ug Lapulapu City Jail. Lakip sa butangan og polling precinct mao ang Talisay City jail, Toledo, ug Danao, sa Negros Oriental mao ang Bayawan ug Dumaguete City Jail.
Ang mga bilanggoan sa Siquijor ug lalawigan sa Bohol wala makaabot og tagsa ka gatos ka pinirisong botante ug gimandoan na ang ilang mga jail wardens pagpangayo og pagtugot sa mga korte aron temporaryong makagawas ang mga bilanggong botante karong eleksyon aron makabotar.
Segun sa nasayran ubos sa lagda sa Commission on Elections (Comelec) ang mga prisohan nga dili makaabot og usa ka gatos ka detainee voters kinahanglan kuhaan og court order ug eskortan paingon sa ilang tagsa-tagsa ka presento atol sa eleksyon.
Gumikan niini, ang kadagkuan sa BJMP-7 makigtagbo ngadto sa bag-ong nilingkod nga regional director sa Comelec-7 Dennis Ausan aron plantsahon ang hugot nga seguridad sa mga pinirisong mobotar. (BANATNEWS)