Empleyado di angay gamiton sa eleksiyon

CEBU, Philippines - Mipasidaan ang Department of Interior and Local Government Unit (DILG)-7 sa mga incumbent local officials nga magpasubli sa ilang katungdanan sa dili paggamit sa ilang resources ug empleyado sa ilang tagsa-tagsa ka buhatan atol sa pangampanya niining nahabiling 17 nalang ka adlaw sa dili pa ang eleksyon.

Si DILG-7 regional director Pedro Noval mipasidaan niini human siya makadawat og daghang reklamo, mga reports nga daghang mga incumbent officials nga migamit sa pundo sa ilang mga buhatan alang sa ilang pangampanya.

Matud pa ni Noval kinahanglan kaugalingong pundo, ekipo ug mga sakop ang gamiton sa mga politikong magpasubli sa katungdanan.

Si Noval mipasidaan nga dunay silot nga atubangon ang incumbent officials nga moabuso niini tungod sa ilang gahom kun dunay lig-ong reklamo ug dunay mga saksing makatumbok sa alegasyon. (BANATNEWS)