CEBU, Philippines - Gilusad kagahapon ni sportsman ug magpapatigayon Jonathan “Atan” Guardo ang iyang mga legislative plan nga iyang ipatuman kun mapili pagka-kongresista sa habagatang distrito sa siyudad sa Sugbo.
Sa maong kalihukan, si Guardo nagkanayon nga kinahanglang mahibaw-an sa katawhan sa distrito ang mga isyu sa siyudad nunot niining nagkakunhod nga posisyon niini isip siyudad, ilabi na ang habagatang distrito.
Matud ni Guardo nga sa milabay’ng 10 ka tuig, mi-ungot ang pag-uswag sa siyudad. “Its administration went out of focus from governance that left every Cebu city taxpayer indebted with P800 million for the next 20 years,” kaniya pa.
Gikinahanglan karon, matud niya, ang mga paninguha alang sa pagpalambo sa ekonomiya nga mag-focus sa habagatang distrito nga sumala niya nahibiyaan ug naapsan sa gagmay’ng kasilinganan.
Sumala pa ni Guardo nga mogama siya og livelihood ug microfinance nga maghatag og access to capital balor og P10 mil ngadto sa P50 mil sa mga gagmay’ng negosyante, gawas sa training nga ihatag kanila.
Buot usab ni Guardo nga mahulma ang Eco-District nga langkoban sa mga bukirang barangay nga mahatagan unya og kinaugalingon nilang mga programa ug proyekto.
Pakusgan usab niya ang youth development ug sports program aron malikay sila sa ginadiling drugas. Gawas niini, mangamahan siya og balaodnon alang sa katukoran sa modernong state university sa bukirang barangay ug maghatag og dugang pundo alang sa libreng edukasyon.
Gitinguha usab niya ang pagpalambo sa mga tunghaan pinaagi sa pagpakatap og mga computers, himuong moderno ang mga laboratoryo ug digital nga library.
Si Guardo miingon nga paninguhaon usab niya nga mapasar ang balaod nga maghulma og Road and Transport Authority sa Metro Cebu, ug balaod nga maghatag og dugang pundo nga ibubo aron himuong moderno ang Cebu City Medical Center ug i-upgrade sa mga health centers nga matud niya gipasagdan lang ni Mayor Tomas Osmeña.
Paninguhaon usab niya ang SRP Development Authority nga ipadagan sa mga propesyonal nga mga manager. (BANATNEWS)