Palcuto mosumpo sa krimen

CEBU, Philippines - Ang pagsanta sa naghitak nga krimen sa siyudad sa Sugbo maoy prayoridad sa retiradong opisyal sa kapolisan kun modaug siya sa pagka-bise mayor karong umaabot nga piniliay sa Mayo 10.

Si vice mayoralty candidate Rico Palcuto nagkanayon nga ipunting niya ang iyang tibuok panahon sa pagsulbad sa nagkalainlaing krimen ning dakbayan kun hatagan siya og higayon sa katawhan nga makahupot sa maong katungdanan.

Matud pa niya nga ang paghitak sa pinatyanay, tulis, pagpanglugos, ilegal nga drugas ug uban pang panghitabo dinhi sa dakbayan maoy iyang atubangon ug hatagan og sulbad.

Giangkon niya nga nasubo kaayo siya matag karon ug unya nga pagsulbong sa krimen niining dakbayan nga naghatag ug walay kasiguroan sa tanan.

Gani matud pa niya nga nahinuklog kaayo siya sa mga nakita sa iyang pagsuroy -suroy sa kabarangayan sa iyang pangampanya diin iyang nakita ang mga bata nga libod suroy ug ang uban gipasagdan sa mga ginikanan nga nagkagidlay ug hugaw kaayo ang kalawasan samtang ang mga ginikanan nalingaw sa sugal nga tong its.

Gipasalig ni Palcuto nga kun siya mahimong bise mayor, himoon niya ang patas ug walay pagpinig nga pagpatuman sa balaod aron mahibalik ang kamalinawon ning dakbayan ug madani ang mga negosyante pagbubo og puhunan dinhi alang sa paghatag og dakong higayon sa kapanarbahoan sa mga walay trabaho. (BANATNEWS)