2 ka opisyal sa Magdalo gipaway sala

CEBU, Philippines - Gikalipay og maayo sa grupong Magdalo ang pagpawalay sala sa duha ka mga opisyal niini ug gipabuhian sa Armed Forces of the Philippines gikan sa (Intelligence Service AFP (ISAFP) compound human sa pito ka tuig nga pagkabilanggo may kalambigitan sa 2003 Oakwood mutiny ug Manila Peninsula siege niadtong 2007.

Ang gimandong pabuhian niadtong Abril 18, 2010 sa Armed Forces of the Philippines subay sa kamandoan nga gipirmahan ni Chief of Staff, General Delfin Bangit, mao sila si kanhi Marine Captain Gary Alejano ug kanhi Navy Lt. Senior Grade (Lt. SG) James Layug.

Si Alejano ug Layug parehong mikandidato sa lokal nga posisyon sa ilang mga dapit alang sa May elections kauban usab sa ilang tigpamaba nga si kanhi Lt. Ashley Acedillo nga midagan sa pagka-kongresista dinhi sa north district sa dakbayan sa Sugbu.

Si Alejano mikandidato pagkamayor sa Sipalay City sa Negros Occidental samtang si Layug kandidato usab sa pagka-kongresista sa second district sa Taguig City.

“This is an answered prayer for the Magdalo officers, their families, and supporters. On a personal note, I am very happy to finally see them make their walk of freedom,” matud pa ni Acedillo sa gipadalang pamahayag dinhi sa Banat News.

Ang maong uwahing kalamboan may kalambigitan kini sa ilang pagka-kombikto sa usa ka military tribunal niadtong Abril 7, 2009 nga nakakita kanilang guilty sa paglapas sa 70th Article of War (breach of arrest and/or escape from confinement); paglapas sa 63rd Article of Water (disrespect toward the President); paglapas sa 96th Article of War (conduct unbecoming an officer and gentleman); ug kalapasan sa 97th Article of War (conduct prejudicial to good order and military discipline).

Sila gisentensyahan kaniadto og walo ka bulang pagkabilanggo. Human sila mabilanggo og duha ka tuig human sa Manila Pen siege gikonsiderar nga naserbisyuhan na nila ang ilang silot.

Samtang ang laing kasong paglapas sa 67th Article of War (Mutiny or Sedition) gi-dismiss.

Gipaabot sa Magdalo nga lakip sa ma-release karong adlawa mao sila si kanhi Navy LTSGs Eugene Gonzales, Manuel Cabochan, ug Andy Torrato, ug kanhi Air Force Captain Danny Orfiano, kanhi Lt. Junior Grade Arturo Pascua (Navy), Lt. Billy Pascua (Air Force), Lt. Jonnel Sangalang (Marines), ug Navy Ensign Armand Pontejos. (BANATNEWS)