Bucao mihimakak sa pasangil

CEBU, Philippines - Si Bise Mayor Alan Bucao sa dakbayan sa Talisay mihimakak sa mga pasangil nga siyay nagpasikop sa kanhi barangay kapitan sa Manipis, sa maong dakbayan kinsa nadakpan sa kapolisan kay naghupot og armas nga walay lisensya niadtong Domingo sa buntag.

Kini sa dihang si kanhi kapitan Leovildo Togonon mikulisiw dihang gidakop siya sa kapolisan ug gisakmit ang iyang   shotgun nga may 12 ka buhing bala, ug usa ka 9mm pistol nga may 20 ka buhing bala nga pulos walay lisensya ug ang bise mayor maoy iyang gipasanginlang nagpadakop kaniya.

Ang mga misikop kaniya mao ang mga sakop sa Criminal Investigation and Detection Group nga gipangulohan ni Chief Inspector Rene Kyamko uban sa taga Special Reaction Unit sa Cebu Provincial Police Office ug Regional Intelligence Division. Dala sa maong mga otoridad ang search warrant nga giluwatan ni Regional Trial Court Judge Soliver Peras sa branch 10.

Samtang nagkagulkol na si Togonon sa prisohan, nagpunay kini og hiwasa kay si Bucao gyud maoy iyang pasanginlang nagpadakop kaniya.

Apan matud pa ni Bucao nga dili man tingale dakpon si Togonon kun wala pa kini hiniposang armas nga ihas.

Si Bucao kinsa maoy presidente kaniadto sa Agrivet Rural Technology Hilly Upland Resources (ARTHUR) nga nahinabi sa Banat News kagahapon nagkanayon nga wala siya’y kalibutan sa mga pasangil ni Togonon.

Matud niya nga si Togonon maoy presidente karon sa ARTHUR ug wala siya’y labot sa kalihukan niini.

Midugang si Bucao nga kaniadtong siya pa maoy presidente sa ARTHUR nakapasikop siya og mga sakop ni Togonon kay namutol og kahoy sa bukiran sa Manipis.

Siya miingon nga dili siya traydor ug dili kaantigong mo- buko-buko sa iyang mga kaatbang sa politika ug kun may mobangon nga problema kaantigo siya nga makig-estorya aron mahusay ang unsa mang suliran. (BANATNEWS)