Anti-kolurom operation sa LTO kadawat saway

CEBU, Philippines - Nangatanggong ang gatusang pasahero gikan sa amihanang bahin sa Sugbu tungod sa inspeksyon batok sa mga kolurom nga sakyanan sugod alas-6 hangtud alas-8 sa buntag ug miresulta sa 30 porsiyentong pagkabalda sa transportasyon diha sa amihanan, sumala pa sa City Traffic Office Management.

Na-obserbahan sa Banat News nga ang kadaghan sa mga pasaherong natanggong gikan sa Bulacao hangtud sa Mambaling diin kasagaran sa mga empleyado sa pribado ug lain-laing ahensya sa gobiyerno na-late, lakip na ang pipila ka empleyado sa Cebu City Hall. Ang operasyon gipangulohan ni Chief Operation Officer sa Land Transporationa Office-7 nga si Aden Belza batok sa mga kolurom nga mga pasaheroan inabagan sa City Traffic Office Management ug kapolisan. Sa pakighinabi sa Banat News ni Belza, kini mibutyag nga sagad sa mga gipang-impound adunay mga kakulangon sa papeles aron legal nga makapamasahero.

Gipasabot ni Belza sa mga operators nga dili angayang mahadlok sa susama niining operasyon kun duna silay legal nga dokumento.

 Ang maong operasyon nasentro sa barangay Mambaling ug barangay Basak San Nicolas apan ang mga operators ug drivers sa PUJ wala na mobiyahe pagkahibawo niini hinungdan sa pagkatanggong sa gatosan ka pasahero.

Si Konsehal Sylvan ‘Jack’ Jakosalem miklarong wala gyud untay labot sa maong operasyon ang mga pampublikong sakyanan, apan duna gyuy pipila ka drayber sa PUJ ang wala mobiyahe gumikan sa kahadlok nga madakpan.

Si Konsehal Bebot Abellanosa mi-deploy sa mga Kaoshiong buses ug gihakot ang mga pasahero paingon dinhi sa kinapusoran sa dakbayan.

Matud ni Arnel Tancinco, executive director sa CITOM nga labing menus napulo ka sakyanan nga kwestyonable ang dokumento ang gi-impound sa LTO ug CITOM, usa kanila kolurom ug ang uban sayop ang kolor ug chassis.

Nagtuo karon si Tancinco nga ang pagkahadlok sa mga operators ug drayber kagahapon tungod sa operasyon nagpasabot nga daghan kanila ang kwestyonable og prangkisa.

Si LTFRB-7 regional director Romulo Bernardez mikumpirmar nga ubay-ubay nga pampublikong sakyanan walay klarong prangkisa.  (BANATNEWS)