Boksidor 'Nanulis' Gisikop

CEBU, Philippines - Wala mahinayon ang pakigsangka ibabaw sa ring sa usa ka amateur boxer sa gipahigayong lokal nga boksing diha sa lungsod sa Liloan human kini gidakop sa kapolisan gumikan sa kasong pagpanulis.

Ang gidakop mao si Edmund Tuñacao Jr., 28, taga barangay Opao sa dakbayan sa Mandaue subay sa warrant of arrest nga giluwatan ni Judge Ulrich Cañete sa Branch 59 sa Regional Trial Court-7.

Ang pagpanulis nahitabo niadtong tuig 2009 diha sa barangay Cambaro nga diin gikatahong gitumbok si Tuñacao nga usa sa mga nagmotorsiklong tulisan.

Ang pagdakop gihimo alas-7 pasado ang takna sa miaging Domingo sa gabii sa atubangan sa munisipyo sa barangay Centro diin gipahigayon ang sinemanang boksing alang sa mga amateur boxers.

Si Inspector Wilson Abot, deputy chief sa Presinto 5 sa Opao Police Station maoy nangulo sa pagdakop kang Tuñacao.

Matud pa ni PO2 Eleazar Llanes sa Opao Police Station, taudtaod na nilang gipangita ang suspetsado sa kasong robbery with disobedience of person in authority.

Gitug-an ni Llanes nga si Tuñacao naaktohan gyud sa nagpatrolyang mga polis sa pagpanulis niadtong tungura apan daling nakaikyas bisan paman sa ilang paggukod ug pagmando kaniya sa paghunong.

Dugang pa ni Llanes nga miangkon si Tuñacao nga human sa maong insidente mitago kini sa kabukiran sa lungsod sa Sogod ug mibalik lang sa Mandaue sa pagtuong nakalimtan na sa mga polis ang iyang kaso ug nakahukom usab sa pagbalik og pamoksing.

Si PO2 Llanes mitug-an nga mihangyo pa unta ang suspetsado nga human na lamang unta sa iyang away siya dakpon apan wala siya tuguti ni Insp. Abot sa kabalakang makaipsot kini.

Nasuta nga dako unta ang ganting nagpaabot sa mananaog sa maong boksing gawas sa kasikat. (BANATNEWS)