Tiguwang babaye gikawata'g ariyos sa ahente sa tambal

CEBU, Philippines - Usa ka senior citizen nga babaye gikawatan og usa ka parisang ariyos sa ahente og tambal, didto sa barangay Pugalo, lungsod sa Alcoy sa miaging adlaw.

Ang biktima mao si Zita Cabasan, 70, nga taga Pugalo, samtang ang misakiyo sa iyang bulawang ariyos, wala hiilhing ahente sa tambal nga sa samang higayon usa usab ka masahista.

Sumala ni PO1 Wilfredo Tautaon sa Alcoy Police Station nga nag-inusara ra sa iyang balay ang biktima , dihang miabot ang usa ka tawo nga nagpailang usa ka ahente og tambal.

Samtang gipaila niini ang nagkalainlaing klase sa iyang tambal nga alang sa panuhot, pamaol, ug panakit sa kalawasan, mitanyag kini nga iyang sampolan ang biktima pinaagi sa pagmasahe sa kalawasan niini nga haplasan sa iyang tambal.

Apan samtang nagmasahe kini, gihinayhinay usab og tangtang ang ariyos sa tiguwang gikan sa duha niya ka dunggan.

Dihang gibadlong kini sa biktima nga dili pahilabtan ang iyang ariyos, midali kini sa paggawas sa balay ug misakay sa iyang motorsiklo.

Unya misiyagit ang biktima nga ipauli ang iyang ariyos, apan mipasutoy kini og padagan pahilayo sa maong lugar.

Wala masuta ang kantidad sa karaang ariyos sa tiguwang, ug nadala pa ang P200 niini.

Gipangita pa karon sa kapolisan ang maong ahente. – BANAT NEWS