Ulitawo giselosan giluba

CEBU, Philippines - Usa ka ulitawo gidunggab sa ig-agaw sa iyang uyab didto sa barangay Toong, ning dakbayan sa Sugbo, sa miaging kaadlawon.

Ang biktima mao si Ricky Abastas, ulitawo, nga taga sitio Kalumboyan, barangay Toong, samtang ang suspetsado mao si Edgar Java Jr., nga taga sitio Kangkong, usa ka mangunguling sa barangay Toong gihapon.

Sumala sa kapolisan nga ang biktima kauban sa iyang amigo nga si Glenford Cabatingan, naglakaw   paingon sa ilang balay dihang ang nagsunod nga suspetsado kinsa daan nang may kalagot sa biktima, milanit sa iyang kutsilyo ug sa walay daghang langas gihansak sa buko-buko sa naulahi.

Sumala sa kapolisan nga ang biktima ug si Analie Java nga ig-agaw sa suspetsado dugay nang nagkauyab.

Apan nagselos ang suspetsado niini, hinungdan nga gipahungaw niya ang tanan pinaagi sa pagluba ngadto sa biktima. Gihatod dayon ngadto sa Cebu City Medical Center sa biktima samtang ang suspetsado gipangita pa karon sa kapolisan. – BANAT NEWS