Resulta sa test sa coal ash sa Naga pamolitika

CEBU, Philippines - Ang mayor sa siyudad sa Naga nga si Mayor Valdemar Chiong nga nagdudang may sagol pamolitika ang pagpagawas sa resulta sa pagtuon sa Philippine Institute of Pure and Applied Chemistry (Pipac) sa Ateneo de Manila University Campus sa Quezon City niadtong Enero 18, 2010.

Ang resulta nag-ingong ang coal ash nga gipangtambak sa nagkadaiyang dapit sa dakbayan sa Naga ug sa Pitalo, San Fernando may lama sa heavy metals sama sa arsenic, cadmium ug mercury nga makadaot sa kalikupan ug panglawas sa tawo.

Kini tungod kay ang maong pagtuon gipahigayon niadto pang bulan sa Enero apan gipagawas na lamang karong nakabuwelo na ang election campaign alang sa umaabot nga piniliay karong Mayo 10.

“Mura man og it is being used for election purposes. Ingon man sila January pa ang resulta unya nganong karon duol na sa election migawas?” sigon pa ni Chiong.

Gipasabot ni Chiong nga dili siya makapasangil sa iyang mga kaatbang sa politika sa dakbayan sa Naga apan iyang gitataw nga posibleng ang mga naa sa oposisyon sa probinsiya nga kontra ni Gov. Gwendolyn Garcia maoy nagpasiugda niini.

Wala hinuon giklaro ni Chiong kun ang mga kampo ni Liberal Party gubernatorial candidate Hilario Davide III maoy nagpaluyo sa pagpagawas sa maong resulta aron maapektohan gyud ang kandidatura ni Garcia sa maong kontrobersiya.

Samtang giklaro ni Chiong nga wala nay nahitabong coal ash dumping sa iyang siyudad dili tungod sa naasoy’ng kontrobersiya kay nagpaabot pa sila sa resulta sa testing sa Department of Environment and Natural Resources sanglit mao kini ang tukmang ahensya nga mopahigayon og testing.

Iyang gitataw nga dili sila motuo sa migawas nga independenteng pagtuon sa mga grupo sa mga environmentalist sanglit sila ra man ang naghimo sa sampling ug wala kini makig-coordinate sa iyang buhatan.

Dugang pa niini nga ang iyang buhatan andam nga mohimo og correction kun mapamatud-an sa confirmatory test sa DENR nga makadaot ba gyud ang gitambak nga coal ash. – BANAT NEWS