2 ka puya nakit-an sa M'daue

CEBU, Philippines - Duha ka puya nakit-an sa managlahing dapit sa siyudad sa Mandaue niadtong milabay’ng adlaw pasado alas dos sa hapon.

Si Emilita Tac-an, 53, molupyo sa Purok Tambis sa barangay Umapad sa maong dakbayan mipahibalo sa kapolisan kabahin sa usa ka lalaking puya nga gibana-banang pito pa ka bulan samtang nanguykoy siya og basura diha sa Umapad dumpsite.

Ang bata gikatahong giputos og habol nga bag-uhay palang giyabo uban sa mga basurang gidala sa garbage truck sa barangay Alang-alang sa maong dakbayan.

Laing manguykuyay og basura nga si Junrey Heyrosa, 28, ang nakakuykoy og usa ka gibana-banang pito ka buwang babayeng puya diha sa usa ka basurahan sa barangay Cambaro sa samang dakbayan. Ang babayeng puya giputos og plastik uban sa mga basura sa usa ka sudlanan sa basura.

Ang gwardiya sa usa ka planta sa tubig duol sa maong basurahan nga si Auxillo Sulpicio mitug-an nga nakakita siya og usa ka babayeng mikanaog gikan sa usa ka taxi gikan sa siyudad sa Lapulapu ug milabay og usa ka plastic bag sa maong basurahan.

Ang duha ka puya gidala sa Saint Joseph Parish Church ug gipabendisyunan ug gipalubong samtang nagpadayon pa ang kapolisan sa imbestigasyon sa maong hitabo. – BANAT NEWS