Litmon may sea wall na

CEBU, Philippines - Luwas na sa peligro ang mga molupyo sa kabaybayonan sa barangay Dumlog sa dakbayan sa Talisay karong natapos na ang sea wall nga gipatrabaho sa kagamhanan sa dakbayan uban sa abag sa kagamhanan sa lalawigan sa maong lugar.

Gani gi-inugorahan na kini niadtong Biyernes sa buntag ug gibendisyonan ni   Padre Juditho Rosendi sa Santa Teresa de Avila.

Si Gobernador Gwendolyn Garcia ug Mayor Socrates Fernandez maoy miputol sa laso uban sa pag-ayuda sa mga opisyal ug mga mikandidato sa siyudad.

Si Kapitan Charles Basillote sa barangay Dumlog mapasalamaton kaayo sa tabang nga gihimo sa kagamhanan sa siyudad ug sa probinsiya pinaagi sa pagtaod og sea wall sa lapyahan sa baybayon sa Litmon.

Kahinumdoman nga sa pipila ka tuig nga milabay , nasakripisyo pag-ayo ang mga molupyo sa maong lugar nga halos wala nay kinatulgan magabii sa panahon sa tinghabagat.

Kini tungod kay ang lapyahan sa dagat sa Litmon diin anaa nanurok mao rag uhong ang kabalayan maoy santakuhon pag-ayo sa maglagubo nga mga higanteng bawod.

Ang sea wall nga nagsilbing dike sa maong lugar may gitas-ong kapin sa 500 metros ug nahimo karong proteksyon sa tulo ka sitio nga mao ang Romahan, Santo Niño ug Litmon gikan sa mga bawod nga molamba sa panahon sa tinghabagat.

Ang sitio Romahan ug Litmon may kapin 200 ka mga panimalay nga girumbo kanunay sa mga bawod.

Si Engineer Ariel Araw-araw sa Talisay City Engineering Office sa pakighinabi sa Banat News mibutyag nga ang kagamhanan sa probinsiya sa Sugbo mihatag og 5,000 ka sako nga semento ug ang counter part niini sa siyudad mao ang pagtrabaho, mga bato ug bas .

Gipasalig ni Araw-araw nga puwerting lig-ona sa maong sea wall kay may napulo ka tiil ang gilawmon sa pundasyon niini sa ilawom sa yuta.

Ang ubang tigpaniid nagkanayon nga maghilak na ang mga bawod sa panahon sa tinghabagat kay dili na sila makaluka sa maong sea wall.