CEBU, Philippines - Gibutyag si Lapulapu mayorality candidate Paz Radaza nga dili nalang tagdon ang nagkalain-laing isyu nga gihapak sa mga oposisyon batok sa iyang bana nga si Mayor Arturo Radaza sa dakbayan sa Lapulapu.
Sa pakighinabi sa mga tigbalita sa Banat News ug sa igsuong pamantalaan niini nga mao ang The Freeman, gipasabot ni Radaza nga dili ganahan mo komentaryo ang iyang bana batok sa nagkalain-laing tsismis ug mga pagdaot sa pagkatawo ug sa liderato niini diha sa Lapulapu aron nga dili siya husgahan sa mga tawo nga sad-an siya.
Ang 61 anyos nga magpapili pagka-mayor sa dakbayan sa Lapulapu nagkanayon nga sama sa ubang mga mikandidato usab sa pagka mayor sa ilang dakbayan, siya andam usab moalagad ug moserbisyo kutob sa iyang mahimo alang sa taga Lapulapu.
Iyang ipadayon ang iyang nasugdang proyekto isip lider sa komitiba nga nag -organisa sa Clean and Green Project, Solid Waste Management, Tourism ug ang Local Council of Women and Nutrition.
“Dili sad nato maingon nga perfect gyud no, but I believe nga naa gyu’y nabuhat” kini sa iyang pagklaro usab ang isyu kahabin sa mga basura ug hugaw nga palibot ilabina sa plaza sa dakbayan.
Aduna usab sila’y gihimo nga mga inter-sitios sportsfest para sa mga kabatan-onan nga gisuportahan sa kagamhanan.
Gihimakak usab niya ang alegasyon sa ilang mga kaatbang nga matud pa nga dunay sakit ang iyang kapikas .
“Dili tinoud nga nagmasakiton siya, nakasugat man gyud na siya sa una og car accident busa naka-bone infection siya. Plano unta namo nga moadto og States ,pero busy pa man gud kaayo,” matud pa niini.
Giklaro usab niya nga ang pagdagan niya pagka-mayor subay kini sa iyang kabubut-on ug dili tungod sa mando sa iyang bana. (BANATNEWS)