Congressional funds usbon

CEBU, Philippines - Higpit ang panagsakbang sa tulo ka mga kandidato alang sa pagkakongresista sa ikaunom nga distrito aron mohulip kang Kongresista Nerissa Soon-Ruiz nga motapos na sa iyang ikatulong termino sa Hunyo niining tuiga.

Ang nagkombati mao sila si Konsehal Victor Biano sa partido independente, Areston Balodong Cortes nga maoy standard bearer sa Liberal Party (LP) ug kanhi Provincial Board Member Gabriel Luis Quisumbing nga maoy standard bearer sa One Cebu party ug Lakas Kampi.

Si Kapitan Damaso “Soy” Tumulak sa barangay Labogon nga maoy campaign manager ni Konsehal Biano mibutyag sa Banat News nga iyang gipasabot nga sa tulo ka mga papili nga kongresista si Biano lamang ang nagtinguha sa kausaban bahin sa paggamit sa congressional funds o gahin alang sa matag kongresista.

Matud niya nga si Biano gusto nga ang congressional funds ideretso paghatag ngadto sa kapitan sa barangay alang sa mga proyekto sa kabarangay ug dili kay adto sa mga tawo sa Department of Public Highways (DPWH).

Dugang pa ni Tumulak nga si Biano takus kaayo nga modala sa tingog sa ikaunom nga distrito didto sa kongreso sanglit aduna kini lapad nga kasinatian dili lang pagkakonsehal, kundili isip usa ka abogado , nagserbisyo pa gyud siya isip usa ka city administrator sa dakbayan sa panahon ni kanhi Mayor Alfredo Ouano ug uban pa. (BANATNEWS)