CEBU, Philippines - Midangop sa kapolisan sa Opao Police Station ang usa ka tawo nga gitulis sa tulo ka wala hiilhing armadong tawo didto sa dalan United Nation Avenue sa barangay Banilad, dakbayan sa Mandaue sa miaging kaadlawon.
Ang biktima mao si Ernesto Rosacena, 28, ulitawo, nga taga sitio Hermag Village sa barangay Paknaan, dakbayan sa Mandaue.
Si PO1 Rico Penilong sa kapolisan sa Presinto 5 sa Opao Police Station nga nahinabi sa Banat News mibutyag nga ang biktima nagpaingon sa iyang trabaho sa MEPZ sa dakbayan sa Lapulapu ug naglakaw sa maong lugar dihang giatangan sa mga tulisan.
Unya nakalitan siya dihang gitionan siya sa mga armas de fuego niini uban ang pagdeklarar nga tulis.
Gumikan sa kabalaka nga patyon siya, wala na siya mosukol ug gipasagdan ang maong mga tulisan nga mikuot sa iyang pitaka nga may sulod nga wala hisayring kantidad sa kuwartya ug ang iyang cellphone.
Human siya himulboli, misutoy dayon ang mga tulisan ug mipahilayo gikan sa maong lugar.
Ang kapolisan padayon pa sa pag-follow up ug pag-ila sa maong mga tulisan nga gituohan nilang taga diha ra sa maong lugar. – BANAT NEWS