Gikawata'g cellphone mitungha

CEBU, Philippines - Mitungha kagahapon sa buntag sa Talisay City Police Station ang menor de edad nga tag-iya sa cellular phone nga gikawat gikan kaniya sa usa ka ex-convict kinsa napusilan patay niadtong Huwebes sa kaadlawon didto sa sitio Mananga I, barangay Tabunok, dakbayan sa Talisay.

Si Wendel Sali-ot, 17-anyos taga sitio Kalmar, Lawaan II sa nahisgutang siyudad, usa ka tindero og karne sa merkado sa Tabunok uban sa iyang ig-agaw nga si Christine Libreha,   maoy mikuha sa iyang cellphone gikan kang PO3 Mikie Espina.

Ang suspetsadong mikawat sa iyang cellphone mao si Desiderio Cabriana alyas “Dessie”, 20, taga barangay Lawaan III sa maong siyudad kinsa usa ka ex-convict .

Apan human niya kawata ang cellphone sa biktima matud pa gipusil usab kini sa usa ka pusher niadtong Huwebes sa kadlawon didto sa sitio Mananga I.

Ang mipusil kang Cabriana, padayon pang gipangita sa mga polis hangtod karon.

Si Sali-ot mitug-an kang Espina nga niadtong Miyerkules sa gabii si Cabriana kinsa adunay laing kuyog kalit lang mitungha sa stall sa karne nga iyang gibantayan ug nangayo   og chorizo.

Ang suspetsado gihatagan niya og chorizo apan giapil og dala ang iyang cellphone   gipatong sa tadtaran.

Sa pagkakaadlawon sa adlaw'ng Huwebes, mao nalay nasayran sa taga Talisay nga napusilan si Cabriana ug nasabak kini sa bala sa iyang walang nawong ug likod nga bahin sa ulo ug wala na makaabot nga buhi sa Talisay City District Hospital.

Ang inahan ni Cabriana daan nang mitug-an ngadto sa mga polis nga ang iyang anak usa ka rugby boy ug nalambigit kini sa mga insidente sa tulis diha sa Mananga ug gani tulo ka higayon na kining napriso diha sa Talisay City Jail tungod sa kasong pagpanulis.  – BANAT NEWS