Way brownout atol sa eleksyon; watchlist hayan madungagan

CEBU, Philippines - Bisan paman sa kakuwang og supply sa kuryente dinhi sa Sugbu nga maoy hinungdan nga nakasinati og brownout kada adlaw ang pipila ka lugar dinhi sa dakbayan ug Metro Cebu, apan gipasalig ni Comelec-7 Assistant regional director Atty. Lionel Marco Castillano nga usa ka semana sa dili pa ang adlaw sa piniliay wala nay mahitabong brownouts.

Si Castillano atol sa panagtigom sa kapolisan, Comelec ug armadong kusog sa Pilipinas diha sa Capitol Social Hall nga gipatawag sa bag-ong milingkod nga regional director sa Comelec-7 nga si Atty. Dennis Ausan nagkanayon nga kuwang gyud kaayo sila og personnel maong nagkinahanglan sila og augmentation sa 78th Infantry Battalion nga maoy mobantay sa Precinct Count Optical Scan (PCOS) machine.

Gawas pa niini ipatawag usab sa Comelec ang SmartMatic ug ang mga kompaniya sa kuryente atol unya sa ilang regional conference aron ilang masayran kun makapasalig bang walay mahitabong brownout sulod sa usa ka semana ug laing usa ka semana human sa eleksyon.

Samtang gibutyag sa kapolisan nga posibleng madugangan pa ang listahan nga naa sa watchlist sa Comelec, ang dakbayan sa Bogo butangan usab og dugang seguridad gumikan sa kainit sa panagribal sa mga politiko sa maong lugar.

Gawas niini kadtong mga lungsod nga girekomendar nga ubos sa election watchlist ila kining butangan og daghang polis ug sundalo ilabina kadtong lungsod o siyudad nga dunay kasaysayan sa panagbangi sa managkaribal nga mga kandidatu.

Ang tigpamaba sa Visayan Electric Cooperative nga si Ethel Natera sa pakighinabi sa Banat News mibutyag sila isip distributor sa kuryente aduna nay kaugalingong giandam nga contingency plans ug pagpangandam sa higayon nga dunay kalit nga pagkaputol sa suplay sa kuryente.

Lakip sa gihimo sa Veco mao ang pag-checkup sa mga eskuylahan nga himuong polling precincts isip pag-abag sa gobiyerno ug ang rekomendasyon ilaha nang gihatag ngadto sa Comelec.

Apan giklaro ni Natera nga wala sila’y kontrol kun ang nag-suplay nga mga planta sa kuryente maoy maaberya. – BANAT NEWS