Clerk of court gisuspenso

CEBU, Philippines - Gipatuman na sa Korte Suprema ang pagpatuman sa duha ka bulang suspensyon batok sa Clerk of Court sa Regional Trial Court kon RTC-7 nga si Atty. Jeoffrey Joaquino human mamatud-ing sad-an sa administratibong kasong ‘neglect of duty’ tungod sa pagkahanaw sa mga dokumento sa kasong sibil sa iyang buhatan.

Kauban ni Joaquino sa gipahamtangan og suspensyon mao ang RTC-7 Court Sheriff Arthur Cabigon kinsa maoy gitahasan sa pagtago sa mga dokumento sa korte. Ang duha dili makadawat sa ilang sweldo niining mga panahona.

Si Atty. Allen Davide sa RTC-7 Clerk of Court office miingon nga nagsugod ang suspensyon nila ni Joaquino ug Cabigon niadto pang adlaw nga Miyerkules, Abril 14, 2010.

Sa duha ka pahinang resolusyon sa Supreme Court First Division nga gipirmahan ni Division Clerk of Court Atty. Enriqueta Esguerra-Vidal ug gisaksihan ni Chief Justice Reynato Puno ug laing upat pa ka mga mahistrado niadtong Pebrero 17, 2010, ang Korte Suprema misagop ug niaproba sa findings ug rekomendasyon sa Office of the Court Administrator.

“Clerk of Court Jeoffrey S. Joaquino and Sheriff Arthur R. Cabigon are found guilty of neglect of duty and are suspended from the service for two months each without pay, with a stern warning that repetition of similar acts shall be dealt with more severely,” nagkanayon ang desisyon.

Ang korte mimando usab nga i-redocket isip laing administrative case batok kang Cabigon tungod sa kapakyas niini pagsumiter sa iyang komento labot sa maong administratibong kaso bisan og makaduha na ka higayon nga gipadad-an og kamandoan sa labaw nga hukamanan.

Nasayran nga niadtong nakalabay’ng tuig, si Atty. Salvador Bolong nga taga Neonita Townhomes, R Duterte St., Banawa, Cebu City miduso og extra judicial foreclosure sa korte pinaagi ni Joaquino ug kini gitipigan ni Cabigon apan nawagtang ang dokumento ug wala mahimoi og aksyon sa korte hinungdan nga gipasakaan sila og kasong abuse of authority ug neglect of duty. – BANAT NEWS