Bernardez wa mopirma'g manifesto

CEBU, Philippines - Gipanghimakak sa director sa Land Transportation Franchising and Regulatory Board (LTFRB)-7 nga si Romulo Bernardez labot sa pasangil sa presidente sa Metro Cebu Taxi Operators Association (MCTOA) sa giingong pagpirma og manipesto sa mga operators nga ningpirma sa pagsuporta kaniya.

Si Richard Cabucos, presidente sa MCTOA namahayag nga gihimo sa transport operators ang maong manipesto aron pagkuhag pabor gikan kaniya, apan matud pa niini nga wala gyud siya'y kalibotan sa maong lakang diin giduso ang kopya niini ngadto sa ilahang ulohang buhatan.

Kahinumduman, si Bernardez giralihan sa miaging buwan sa mga operators gumikan sa pasangil nga padayong mipahigayon og husay ang iyahang buhatan sa aplikasyon alang sa bag-ong prankisa sa taxi dinhi sa Metro Cebu.

Giangkon hinuon sa mga opisyal sa LTFRB nga nakadawat sila og 185 ka applications nga laing additional units apan kasamtangan gihunong ang proseso sa mga dokumento ug sa pagkakaron wala pa maaprobahi ang mga aplikasyon.

Apan ang hearing officer sa LTFRB nga si Jose Douglas nikompirmar nga nakapirma siya sa 37 ka applications alang sa prangkisa sa taxi units sa wala pa   mopagawas og memorandum circular 2009-035 ang ilahang ulohang buhatan nga nagsuspenso sa pagpang- isyu og prangkisa sa mga taxi dinhi sa Metro Cebu.

Kini maoy hinungdan nga hugtanong misupak ang mga taxi operators sa lakang sa LTFRB nga duna pay laing taxi units nga madugang dinhi sa Metro Cebu tungod sa ilang rason nga husto na ang gidaghanon sa mga taxi ang kasamtangang nagdagan karun ug napanglantawan sa kadaghanan nga mga drivers nga maapektuhan gyud ang ilang kita kun dunay laing madugang nga taxi units. – BANAT NEWS